पत्र कला 
काठमाडौं । नेपालमा सुनको आयात अस्वाभाविक रूपमा बढेको पाइएको छ । विगतमा मासिक एक सय केजीको हाराहारीमा आयात हुने सुन चालु आवको माघ महिनामा मात्रै तीन क्विन्टल आयात भएको छ । यो माघमा मात्रै ३०१ केजी सुन नेपाल भित्रिएको भन्सार विभागले जनाएको छ ।
भन्सार विभागले बिहीबार सार्वजनिक गरेको तथ्यांकअनुसार चालु आर्थिक वर्षको ७ महिनामा १० अर्ब ४५ करोड ४९ लाख रुपैयाँ बराबरको सुन आयात भएको छ । माघमा कुल ८८७ केजी सुन आयात हुँदा यसबापत सरकारले १ अर्ब १८ करोड ९४ लाख रुपैयाँ राजस्व संकलन गरेको तथ्यांकमा उल्लेख छ ।
यस्तै, चालु आवको पुस मसान्तसम्म कुल ६ अर्ब ७१ करोड ६ लाख रुपैयाँ बराबरको सुन आयात भएकोमा सरकारले कुल ८१ करोड ५० लाख रुपैयाँ राजस्व संकलन गरेको थियो ।
गत आवको सात महिनाको अवधिमा कुल १२ अर्ब ५८ करोड ६५ लाख रुपैयाँबराबरको १५०१ केजी सुन आयात भएको थियो । सो बापत सरकारले कुल १ अर्ब ८८ करोड ७९ लाख रुपैयाँ राजस्व संकलन गरेको थियो । गत आवको समीक्षा अवधिमा सुनको आयात कम भएपनि पनि चालु आवको मंसिर, पुष महिनाको तुलनामा माघमा सुनको आयातमा वृद्धि भएको तथ्यांकले देखाएको छ । गत आवको असार मसान्तसम्म २ हजार ६५१ केजी सुन आयात भएको थियो । त्यसबापत सरकारले ३ अर्ब ६४ करोड ८३ लाख रुपैयाँ राजस्व संकलन गरेको थियो । यस्तै, चालु आवको माघसम्म २ अर्ब ७५ करोड ३५ लाख रुपैयाँको चाँदी आयात भएको छ । सरकारले सो बापत ३२ करोड ९२ लाख रुपैयाँ राजस्व संकलन गरेको छ ।
सरकारले सुनको भन्सारदर २० प्रतिशतबाट १० प्रतिशत कायम गरेपछि व्यवसायीले सुन आयात बढाएका छन् । नेपालमा वाणिज्य बैंकहरूले सुन आयात गरी व्यवसायीलाई बिक्री गर्दै आएका छन् ।
प्रतिक्रिया दिनुहोस्