सात महिनामा ५ अर्बको ल्यापटक आयात हुँदा साढे ९८ करोड राजस्व संकलन

काठमाडौं । चालु आर्थिक वर्षको ७ महिनामा ५ अर्ब रुपैयाँ बराबरको ल्यापटप नेपाल भित्रिएको छ । चालु आव २०८१/८२ को माघसम्म ५ अर्ब १८ करोड ७८ लाख रुपैयाँ बराबरको ल्यापटप र नोटबुक आयात भएको भन्सार विभागले जनाएको छ ।

विभागले सार्वजनिक गरेको तथ्यांकमा ७५ हजार ७३९ थान ल्यापटप र नोटबुक आयात भएको छ । सरकारले आयात बापत ९८ करोड ५१ लाख रुपैयाँ बढी राजस्व संकलन गरेको जनाएको छ। समीक्षा अवधिमा यो वर्ष ७६ करोड ५४ लाख २४ हजार रुपैयाँले आयात बढेको हो । गत आव २०८०/८१ मा ४ अर्ब ४२ करोड रुपैयाँको ल्यापटप र नोटबुक आयात भएको थियो । समीक्षा अवधिमा ७ हजार २०० थान बढी ल्यापटप र नोटबुक आयात भएको छ । यो आयात १७.३० प्रतिशतले बढी हो ।

विभागको तथ्यांक अनुसार नेपालमा विभिन्न ३६ वटा देशबाट ल्यापटप र नोटबुक आयात हुने गरेको छ । यो वर्ष सबैभन्दा धेरै चीनबाट ४ अर्ब ९५ करोड रुपैयाँको ल्यापटप आयात हुँदा मलेसियाबाट १० करोड बढीको आयात भएको छ । दुबै, भारत र सिंगापुरजस्ता देशहरूबाट समेत धेरै परिणममा ल्यापटप र नोटबुक आयात हुने गरेको छ ।

यसैगरी, चालु आवको माघसम्म ३२ करोड ४२ लाख रुपैयाँको ट्याबलेट आयात भएको विभागको तथ्यांकले देखाएको छ । १३ हजार ९९३ वटा ट्याबलेट आयात हुँदा सरकारले ६ करोड रुपैयाँ बढी राजस्व संकलन गरेको उल्लेख छ ।

 

प्रतिक्रिया दिनुहोस्