पत्र कला 
काठमाडौं । एमाले सांसद गोकुलप्रसाद बाँस्कोटाले अमेरिकाबाट कुन–कुन शीर्षकमा कति सहयोग आयो सरकारले सोको प्रतिवेदन तयार पारी सार्वजनिक गर्र्नुपर्ने बताएका छन् ।
आज बसेको प्रतिनिधिसभाको विशेष समयमा बोल्दै बाँस्कोटाले अमेरिकाले नेपाललाई आफ्ना ऐजेन्सी, दूतावास, सरकारमार्फत सहयोग कति र कुन शीर्षकमा सहयोग गरेको हो, सोको प्रतिवेदन बनाउनुपर्ने जरुरी भएको बताए ।
“अमेरिकाबाट के कति सहयोग आएका छन्, अहिले ती सहयोगको अवस्थाका बारेमा जानकारीसहित प्रतिवेदन सार्वजनिक गर्नुपर्छ । नेपालको अन्तर्राष्ट्रिय छवि र राष्ट्रिय भावनामा चोट पु¥याउने काम कहीकतैबाट हुनु हुँदैन”, सांसद बाँस्कोटाले भने, “नेपालले अमेरिकी सहयोगका सन्दर्भमा ठगी गरेको हो वा उहाँहरूले गर्नुभएको हो? सोबारे स्पष्ट हुनु जरुरी छ ।”
उनले अहिलेको अवस्थाबाट नेपालले स्पष्ट नीति बनाएर अघि बढ्नुपर्ने आवश्यकता भएको उल्लेख गर्दै नेपालले कुन सहयोग लिने वा कुन सहयोग नलिने भन्ने विषयमा स्पष्ट हुनुपर्ने धारणा राखे । सांसद बाँस्कोटाले सन् २००२ देखि सन् २०२१ सम्म करिब २१ खर्ब र सन् २०२२ देखि २०२७ सम्म छ सय ६९ मिलियन अमेरिकी डलर नेपालले सहयोग प्राप्त गर्ने भन्ने विषयबारे सरकारले अध्ययन गरी एउटा प्रतिवेदन बनाउनुपर्ने माग गरे । त्यो प्रतिवेदनमा कति–कति रकम कहाँ खर्च भयो? भन्ने विषय स्पष्ट आउनुपर्ने उल्लेख गर्दै सरकारसँग माग गरेका हुन् ।
बाँस्कोटाले भने, “कुन सरकार हुँदा के भयो भनेर हिलो छ्याप्नुभन्दा अब नेपाल समृद्ध र सबल बनाउनका लागि सबै मिलेर योजनाबद्ध काम गर्नुपर्छ । प्राप्त सहयोग र खर्चसम्बन्धी सम्पूर्ण जानकारी सांसद् र आमनागरिकले थाहा पाउनुपर्छ ।”
प्रतिक्रिया दिनुहोस्