पत्र कला 
काठमाडौँ । म्याग्दीको मङ्गला गाउँपालिका– ५ अर्मनकी तेजकुमारी बुढाथोकीले बारी र पाखोमा लगाएको अम्रिसो खेतीबाट गत वर्ष ३ लाख आम्दानी गरिन् । यस वर्ष आम्दानी बढाएर ४ पुर्याउने उद्देश्यका साथ अम्रिसो खेती विस्तार गरेको उनले बताइन् ।
त्यसैगरी बेनी नगरपालिका– २ रोहोटेका बेलबहादुर घिमिरे पनि अम्रिसो बिक्री गरेर दुई लाख आम्दानी गरेको बताउँछन् । यहाँका किसानले अम्रिसो प्रतिकेजी
१२५ का दरले बिक्री गर्दै आएका छन् । “गत वर्ष १२५ मा बिक्री गर्यौ, यस वर्ष मूल्य बढेको छ भन्ने सुनेका छौँ”, घिमिरेले भने ।
उनीहरु जस्तै अन्य किसानले पनि केही वर्षअघि सम्म खेतबारीमा खेर गइरहेको अम्रिसो खेती गरेर आम्दानी लिन थालेका छन् । विगत ५ वर्षदेखि म्याग्दीबाट अम्रिसो व्यापार गर्दै आएका ओढारचौरका कृष्ण गौतमले गत वर्ष १० क्विन्टल अम्रिसो खरिद गरेको र यस वर्ष पनि १२५ मा नै १२ क्विन्टल अम्रिसो खरिद गर्नका लागि किसानलाई पेश्की बुझाइसकेको बताए ।
एक किलो अम्रिसोबाट पाँचवटासम्म कुचो बनाउन सकिने र प्रति कुचो ७५ देखि एक सय सम्ममा बिक्री हुने उनको भनाइ छ । म्याग्दीमा प्रतिकिलो १२५ मा खरिद गरेको अम्रिसो पोखरा पुर्याउँदा १६०, चितवनमा १९० र काठमाडौँमा २ सयमा बिक्री गर्ने गरेको गौतमले बताएका छन् ।
प्रतिक्रिया दिनुहोस्