पत्र कला 
काठमाडौँ । सगरमाथा लुम्बिनी इन्स्योरेन्स कम्पनी लिमिटेड र इनड्राइभ नेपालबीच दुर्घटना बीमा सेवा उपलब्ध गराउने सम्बन्धमा सम्झौता भएको छ ।
इनड्राइभ नेपालका प्रयोगकर्ताहरुलाई छिटो र छरितो रुपमा बीमा सेवा प्रदान गर्ने उद्देश्यले आज एक कार्यक्रमको आयोजना गरी दुई पक्षले सम्झौता गरेका हुन् ।
कार्यक्रममा सगरमाथा लुम्बिनी इन्स्योरेन्सको तर्फबाट प्रमुख कार्यकारी अधिकृत चंकी क्षेत्री र इनड्राइभ नेपालको तर्फबाट निर्देशक रिता पोखरेलले सम्झौतापत्रमा हस्ताक्षर गरेका छन् । सो सम्झौता भएसँगै अब इनड्राइभ प्रयोगकर्ता चालक वा सेवाग्राही दुवै पक्षले बीमा बापतको इन्स्योरेन्स सेवा पाउनेछन् ।
बीमा सेवाबाट दुर्घटनाका कारणले चालक तथा यात्रुहरुको मृत्यु भएमा ८ लाख, दुर्घटनामा परी पूर्ण रुपमा अशक्त भएमा पनि ८ लाख तथा दुर्घटनाको कारणले औषधोपचार गर्नु परेको अवस्थामा ८० हजार सम्मको बीमा रकम कम्पनीले भुक्तानी गर्नेछ ।
नाबालिक यात्रुहरुको हकमा क्षतिपूर्ती रकमको ५० प्रतिशत खर्च पाउने गरी बीमालेखमा रक्षावरण गरिएको कम्पनीले जनाएको छ । साथै, बीमितले सवारी बीमा गरेको अवस्थामा क्षति भएको रकम कम्पनीको दाबी विभाग मार्फत दाबी गरि लिन सक्नेछन् ।
सम्झौताले राइडर तथा इनड्राइभ प्रयोगकर्ताहरुले सरल र सहज रुपमा यात्रा गर्न सक्ने कम्पनीले विश्वास लिएको छ । उक्त बीमा सेवाबाट समग्र बीमा क्षेत्रमा नै सकारात्मक सन्देश प्रवाह हुनुका साथै इनड्राइभ प्रयोगकर्ताले निश्चिन्त भएर सुरक्षित यात्रा महसुस गर्ने कम्पनीको अपेक्षा छ ।
सगरमाथा लुम्बिनी इन्स्योरेन्स कम्पनी लिमिटेडले निर्जीवन बीमा क्षेत्रमा उत्कृष्ट सेवा प्रदान गर्दै आएको छ ।
प्रतिक्रिया दिनुहोस्