बुद्ध एयर र यती एयरलाइन्सको भ्यालेन्टाइन डे अफरः जोडी यात्रुलाई १४ सय रुपैयाँसम्म छुट

काठमाडौँ । निजी क्षेत्रको हवाई सेवा प्रदायक कम्पनी बुद्ध एयर र यती एयरलाइन्सले प्रणय दिवस ‘भ्यालेन्टाइन’को अवसरमा ‘अफर’ सार्वजनिक गरेका छन् ।

बुद्ध एयरले एक सातासम्म एउटा टिकटमा अर्को निःशुल्क दिने अफर ल्याएको छ । तर, सो अफर पर्वतीय उडान (माउन्टेन फ्लाइट) गर्नेका लागि मात्रै भएको कम्पनीले विज्ञप्तिमार्फत जनाएको छ । कम्पनीले १४ फेब्रुअरीका दिन मनाइने प्रणय दिवसलाई थप स्मरणीय बनाउन भ्यालेन्टाइन अफर ल्याएको उल्लेख गरेको छ ।

यती एयरलाइन्सले पनि जुनसुकै गन्तव्यमा यात्रा गर्ने जोडी यात्रुलाई १ हजार ४०० रुपैयाँसम्म छुट दिएको जनाएको छ । यती एयरलाइन्सको ‘मोबाइल एप’ वा ‘वेबसाइट’मा ‘यतीमाया’ ‘प्रोमोकोड’ प्रयोग गरेर सो अफर ग्राहकले लिन सक्ने कम्पनीले जनाएको छ । यसैगरी, फेब्रुअरी ७ देखि १४ तारिखसम्मको अवधिमा यात्रा गर्ने सात जोडीलाई ‘लक्की ड्र’मार्फत होटल सरोवर पोखरामा एक रात बासको अवसर प्रदान गर्ने यतीले जनाएको छ ।

बिहान हुने पर्वतीय उडानमा एउटा टिकटमा अर्को टिकट सित्तैमा दिएको बुद्ध एयरले जनाएको छ । पर्वतीय उडानमा सगरमाथा, नुप्त्से, मकालु, ल्होत्से, गौरीशङ्करलगायत हिमशृङ्खलाको अवलोकन गर्न सकिनेछ । अफरको टिकट बुद्ध एयरको काउन्टरबाट लिन सकिने कम्पनीको विज्ञप्तिमा उल्लेख छ ।

प्रतिक्रिया दिनुहोस्