काठमाडौँ । ‘नेपाल एग्रीटेक तथा नेपाल फुड एण्ड बेभरेज इन्टरनेशनल एक्स्पो’शुक्रबारदेखि काठमाडौँको भृकुटीमण्डपमा आयोजना हुने भएको छ । फागुन २ गतेदेखि सुरु हुने उक्त एक्स्पो फागुन ४ गतेसम्म सञ्चालन गरिने आयोजकले जनाएको छ ।
नेपाल भित्रका कृषि उद्यमी, व्यवसायी सँगै विदेशी व्यवसायी, कम्पनीहरूको प्रदर्शनीमा स्टल रहने छ । कृषि क्षेत्रको समस्त विकासमा सघाउन हेतु मिडिया स्पेस सोलुसन्स प्रा.लि, फ्युचरेक्स ट्रेड फेयर्स एन्ड इभेन्ट्स् प्रा.लि र एक्जिबिसन एन्ड ट्रेड सर्भिसेस इन्डिया प्रा.लिले संयुक्त रूपमा ‘सातौँ नेपाल एग्रीटेक इन्टरनेशनल एक्स्पो’गर्न लागेको हो ।
प्रदर्शनीमा प्रधानमन्त्री कृषि आधुनिकीकरण परियोजना प्रवर्द्धको रुपमा रहेको छ । एक्पोमा नेपाल गाउँपालिका राष्ट्रिय महासंघ, नेपाल पोल्ट्री महासंघ, राष्ट्रिय दुग्ध विकास वोर्ड, नेपाल कृषि सहकारी केन्द्रय संघ र राष्ट्रिय कृषक समूह महासंघ नेपालले सहयोग गर्नेछन् । उक्त एक्स्पो नेपालको कृषि क्षेत्रको यान्त्रीकीकरणमा सहयोग पु(याउन यो प्रदर्शनी कोशेढुङ्गा सावित हुने आयोजक कम्पनीको अपेक्षा छ ।
प्रदर्शनीमा कृषि कर्मलाई सहज र किफायती बनाउन मद्दत पुर्याउने साना औजार, मेसिनदेखि लिएर डेरी मेसिनरी तथा पशुपंक्षीपालन उद्योगमा प्रयोग हुने विभिन्न उपकरणहरू राखिनेछन् । प्रदर्शनीबाट नेपालको कृषि क्षेत्रलाई उपयुक्त हुने नविनतम प्रविधि तथा सेवाहरूको पहिचान गर्न मद्दत मिल्ने र तीनको प्रयोगद्वारा कृषि उत्पादन वृद्धि गर्नुका साथै कृषि उपजमा देशलाई आत्मनिर्भर बन्न टेवा पुग्ने आयोजकको विश्वास छ ।
प्रर्दशनीमा कुखुरापालन, माछापालन, बाख्रापालन, गाई भैंसी पालन, डेरी, कृषिका मेसिनरी औजार, उपकरण, भेटेनरी, खाद्य प्रविधिका बारेमा जानकारी प्राप्त गर्न सकिने छ । मुख्य प्रदर्शनी स्थलमा अलग अलग समूहको स्टल रहने छन् ।
यस प्रर्दशनीमा देशैभरीका अगुवा किसान, नगरपालिका तथा गाउँपालिकाका प्रतिनिधि, व्यवसायी, उद्यमी, व्यापारी, आयात–निर्यातकर्ता, सरकारी तथा गैर सरकारी संस्थाहरू लगायतको उपस्थिति रहने आयोजकले जानकारी दिएको छ । अवलोकनकर्ताका लागि निःशुल्क प्रवेशको व्यवस्था मिलाइएको आयोजकले जनाएको छ ।
प्रतिक्रिया दिनुहोस्