पत्र कला 
काठमाडौं । प्रमुख चिनियाँ स्मार्ट इलेक्ट्रिक भेहिकल (ईभी) निर्माता एक्स्पेङ मोटर्सले सन् २०२५ मा नौ अर्ब युआन भन्दा बढी लगानी गर्ने भएको छ ।
इलेक्ट्रिक भेहिकल निर्माताहरूमध्ये नम्बर वान बनाउने लक्ष्य अनुसार कम्पनीले ईभी भेहिकलको अनुसन्धान र विकासका लागि उक्त लगानी गर्न लागेको हो ।
एक्स्पेङको अनुसन्धान र विकास रणनीतिको प्रमुख विशेषता आफ्नै सेमिकन्डक्टर चिपहरूको विकास र उत्पादन हो । चिप उत्पादनलाई स्वदेशी बनाउँदै कम्पनीले आफ्नो आपूर्ति श्रृङ्खला अनुकुलन गर्ने, सवारी साधनको प्रदर्शन सुधार गर्ने र स्मार्ट ड्राइभिङ प्रविधिमा आफ्नो नेतृत्वलाई मजबुत बनाउने लक्ष्य राखेको कम्पनीले जनाएको छ ।
कम्पनीले आफ्नो उच्च–प्रदर्शनको क्षमतायुक्त ट्यूरिङ चिपको व्यापक उत्पादन गर्ने योजना बनाएको छ, जुन गाडी, उड्ने सवारी साधन र रोबोटहरूमा लागू गर्न सकिन्छ । त्यसका अलावा एक्स्पेङले सेल्फ ड्राइभिङ प्रविधिमा नेतृत्व कायम राख्दै एलथ्री स्तरको सेल्फ ड्राइभिङ क्षमता आफ्ना सवारी साधनहरूमा समावेश गर्ने योजना पनि बनाएको छ ।
कम्पनीका अध्यक्ष तथा सीईओ हे स्याओपेङका अनुसार यो प्रविधिले चालक सहायता प्रणालीलाई सुधार गर्नेछ भने सडक सुरक्षालाई वृद्धि गरी एक्स्पेङलाई स्मार्ट यातायातमा अग्रिम श्रेणीमा स्थापित गर्ने बताइएको छ ।
एक्स्पेङले आफ्नो अन्तर्राष्ट्रिय उपस्थिति विस्तार गर्दै २०२४ मा एक लाख ९० हजार ६८ वटा गा डी बिक्री गरेको जनाएको छ । हालै फिनल्यान्ड बजारमा पनि प्रवेश गरेको छ । कम्पनीले सन् २०२५ मा ६० भन्दा बढी देशहरूमा विस्तार गर्ने योजना बनाएको छ, जसले यसको विश्वव्यापी उपस्थिति अझ बलियो बनाउने विश्वास लिइएको कम्पनीले बताएको छ ।
प्रतिक्रिया दिनुहोस्