काठमाडौं।दक्षिण एशियामा स्थानीय नेतृत्वमा आधारित अनुकुलन(LLA) को स्तरोन्नति र त्यसमा देखा परेका चुनौतिहरू, असल अभ्यास तथा अवसर विषयक एक कार्यशाला आज काठमाडौंमा सुरु भएको छ। वन तथा वातावरण मन्त्रालयको समन्वयमा द ग्लोबल सेन्टर अन एडप्टेशन (GCA) र डि।सि।ए।को आयोजनामा आयोजित उक्त कार्यशालाको मुख्य उद्धेश्य दक्षिण एशिया क्षेत्रका स्थानीय अनुकुलन योजनासँग सम्बन्धित नीति–नियम र अभ्यासको अनुभव साटासाट गर्नु रहेको आयोजकहरूले जानकारी दिएका छन्।
कार्यशालाको उद्देश्य दक्षिण एशियामा स्थानीय अनुकुलन योजनाका लागि उपलब्ध संस्थागत र आर्थिक सहायताका बारेमा सरोकारवालाहरूको बीच समान धारणाको विकास गर्नु र भविष्यमा अनुकुलन योजनाको स्तरवृद्धिका उपायहरू पत्ता लगाउनु रहेको आयोजकको भनाइ छ। कार्यशालामा खाद्य सुरक्षा, पानीको स्रोत व्यवस्थापन, शहरी विकास, जलवायु वित्त लगायतका प्रमुख जोखिमयुक्त क्षेत्रका कार्यक्रमहरूमा चरणबद्ध छलफल हुने छ।
कार्यशालाको उद्घाटन सत्रलाई सम्बोधन गर्दै द ग्लोबल सेन्टर अन एडप्टेशनका ग्लोबल लिड अञ्जु शर्माले यो कार्यशालाले दक्षिण एशियाली क्षेत्रका स्थानीय नेतृत्वमा आधारित अनुकूलनका उत्कृष्ट अभ्यासहरू साझा गर्ने र ती अभ्यासहरूलाई विस्तार गर्नका लागि अवसरहरू पहिचान गरी संवेदनशील समुदायलाई तत्काल सहयोग पुर्याउने कुरामा जोड दिए ।
वन तथा वातावरण मन्त्रालयका उपसचिव सुमन सुवेदीले भने, ‘बढ्दो जलवायु परिवर्तनको असरलाई सामना गर्नका लागि स्थानीय अनुकुलन योजना र कार्यक्रमहरूलाई थप प्रभावकारी बनाउन आवश्यक छ। यस कार्यशालाले ठोस सुझावहरू तयार गर्न सक्ने विश्वास व्यक्त गर्छु।’
डिसिएको राष्ट्रिय निर्देशक सम्झना विष्टले जलवायु परिवर्तन र अन्य विपद् जोखिमका कारण सबैभन्दा बढी स्थानीय समुदाय प्रभावित हुने भएकाले, उनीहरूको विपद् उत्थानशिलता बढाउन आवश्यक रहेकाे कुरामा जाेड दिए । कार्यशालामा “स्थानीय अनुकुलन अभ्यासका सिकाइहरू” नामक पुस्तकको विमोचन पनि गरिएको छ।
कार्यशालामा नेपालसहित भारत, पाकिस्तान, भुटान, श्रीलंका र बंगलादेशका प्रतिनिधिहरू र यस क्षेत्रमा काम गरिरहेका सरकारी तथा गैरसरकारी संस्थाका प्रतिनिधिहरूको सहभागिता रहने छ। कार्यशाला तीन दिनसम्म चल्नेछ र यसमा स्थानीय अनुकुलन कार्यक्रमसँग सम्बन्धित आठ सेसनमा समूहगत छलफल हुनेछ, जसले नयाँ रणनीति र योजना तयार गर्नमा सहयोग पुर्याउने अपेक्षा गरिएको छ।
दक्षिण एशिया भौगोलिक र सामाजिक(आर्थिक दृष्टिले जलवायु परिवर्तनको जोखिमका हिसाबले अत्यधिक संवेदनशील क्षेत्र हो। यहाँका तटीय क्षेत्र र कमजोर पहाडी भूगोल, उच्च जनसंख्या घनत्व, गरीबी, असमानता, र द्रुत शहरीकरण र उद्योगीकरणका कारण यो क्षेत्र विशेष ध्यान आकर्षित गर्दछ। यस कार्यशालाले यस्ता समस्याहरूको समाधानका लागि प्रभावकारी रणनीतिहरू साझा गर्नको लागि महत्त्वपूर्ण अवसर प्रस्तुत गर्नेछ।
प्रतिक्रिया दिनुहोस्