images
images

बैकुण्ठ मानन्धर बने शाइन रेसुङ्गा राष्ट्रिय टेन के डौड प्रतियोगिताको सद्भावना दुत

काठमाडौं । शाइन रेसुङ्गा राष्ट्रिय टेन के डौड प्रतियोगिताको सद्भावना दुतमा बैकुण्ठ मानन्धर नियुक्त भएका छन् ।

यही फागुन ११ गते बुटवलमा आयोजना हुने सर्वाधिक पुरस्कार राशीको १० किलोमिटरको दौड प्रतियोगितामा कीर्तिमानी धावक तथा ओलम्पियन मानन्धरलाई सद्भावना दुतमा नियुक्त गरिएको हो ।

दौड संस्कृतिलाई प्रबद्र्धन गर्ने उद्धेश्यले आयोजना गर्न लागिएको उक्त प्रतियोगितामा दक्षिण एसियाली खेलकुद प्रतियोगिताका कीर्तिमानी धावक मानन्धर सद्भावना दुत नियुक्त भएपछि उनले आयोजक शाइन रेसुङ्गा बैंकलाई धन्यवाद दिएका छन् । उनले आम मानिसको स्वास्थ्य जीवनशैलीका लागि हरेक दिन दौडने संस्कृतिको विकास गर्न सबै जना लाग्नुपर्नेमा जोड दिए ।

‘रन टु शाइन’ भन्ने नाराका साथ शाइन रेसुङ्गा डेभलपमेण्ट बैंक लिमिटेडले बैंकको १७ औं वार्षिकोत्सवको अवसरमा एथलेटिक्समा लोकप्रिय विधाको रुपमा रहेको १० किलोमिटरको राष्ट्रिय स्तरको दौड प्रतियोगिता आयोजना गर्दै छ । सो प्रतियोगितामा सहभागी हुन इच्छुक खेलाडी तथा धावकहरुलाई शाइन रेसुङ्गा डेभलपमेण्ट बैंकको आधिकारिक वेबसाइटमा गएर फारम भर्न सक्नेछन् ।

दौड बैंकको केन्द्रिय कार्यालय कालिकानगरबाट सुरु भएर मणिग्राम चोक हुँदै पुन केन्द्रिय कार्यालयमा पुगेर समापन हुने छ ।

प्रतियोगितामा खुल्ला, स्थानीय ५० बर्ष सम्म र स्थानीय ५० वर्ष भन्दा माथीको गरि तिन विधा रहेका छन् । लुम्बिनी प्रदेशका कुनै पनि जिल्ला (अर्घाखाँची, बाँके, बर्दिया, दाङ, पूर्वी रुकुम, गुल्मी, कपिलवस्तु, नवलपरासी (बर्दघाट सुस्ता पश्चिम), पाल्पा, प्युठान, रोल्पा, रुपन्देहीका धावकले स्थानीय क्याटेगरीमा सहभागी हुन पाउनेछन् । लुम्बिनी प्रदेश बाहेकका अन्य धावकले स्थानीय क्याटेगरीमा आवेदन दिएस्वतः खुला क्याटेगरीमा दर्ता हुनेछन् । सहभागीताको लागि ईच्छुक प्रतियोगिले एउटा विधामा मात्र नाम दर्ता गराउनुपर्ने छ ।

प्रतियोगिताको पुरस्कार राशी ५ लाख रुपैयाँ राखिएको छ । प्रतियोगिताको पुरुष तथा महिला विधाका विजेता धावकले जनही १ लाख रुपैयाँ प्राप्त गर्नेछन् । दोस्रो हुनेले जनही ४० हजार, तेस्रो हुनेले २० हजार, चौथों हुनेले १५ हजार र पाँचौं हुनेले जनही १० हजार रुपैयाँ पाउनेछन् । यस्तै, स्थानीय धावकको सहभागीता बढाउन ५ किलोमिटरको दौडमा ५० बर्ष सम्म र ५० वर्ष भन्दा माथिको गरि दुई विधा समावेश छन् । विजेता महिला/ पुरुष खेलाडीले जनही १५ हजार, दोस्रो हुनेले १० हजार, तेस्रोले ५ हजार र चौथोंले २ हजार पाँच सय रुपैयाँ पाउने आयोजकले जनाएको छ ।

प्रतिक्रिया दिनुहोस्