‘स्वयम्भू महोत्सव’ को तयारी पूरा, फागुन १० गतेदेखि आयोजना गरिँदै

काठमाडौं । काठमाडौं महानगरपालिका वडा १५ले आयोजना गर्न लागेको ‘स्वयम्भू महोत्सव’को तयारी अन्तिम चरणमा पुगेको छ ।

फागुन १० गतेदेखि १७ गते (एक साता) सम्म आयोजना हुने स्वयम्भू महोत्सवको तयारी अन्तिम चरणमा पुगेको वडा नं. १५ का अध्यक्ष इश्वरमान डंगोलले जानकारी दिए । वडाको भौगोलिक अवस्थिति, धार्मिक, सांस्कृतिक तथा सामाजिक रीतिथिति र परम्परा, मठ मन्दिर, चैत्य, गुम्बासहितका प्राचीन स्मारकजस्ता विविधतायुक्त विशेषतालाई पहिचानका रुपमा स्थापित गर्न वडा नं. १५ ले महोत्सवको आयोजना गर्न लागेको हो । वडाध्यक्ष डंगोल भने, ‘सबैले मेरो महोत्सव हो भन्न सक्ने, सद्भावयुक्त पहिचानको प्रवर्धन गर्न महोत्सव आयोजना गर्न लागिएको हो । यो पहिचानले वडासँगै वडाबासी व्यक्ति, समुदाय, निजी तथा सामाजिक क्षेत्र सबैको दिगो विकास हुन सकोस् भन्ने हाम्रो अभिप्राय रहेको छ ।’

महोत्सवमा करिब ६० वटा स्टल राखिने आयोजकले जनाएको छ ।प्रदर्शनीमा परम्परागत बाजा, वडाबासीका जन्मदेखि मृत्यु पर्यन्तका संस्कारसँग सम्बन्धित चित्र, संस्कृति र परम्परासँग सम्बन्धित चित्र, वुद्धको जीवनीसँग सम्बन्धित चित्र, हुलाक टिकट र मुद्रा राख्ने बताइएको छ । वडामा उत्पादन गरेका मौलिक सामान तथा बस्तु पनि प्रदर्शन गरिनेछ । मौलिक खानाका स्टल, रञ्जना लिपि लेखन, मुहार चित्रकारिता (फेस पेन्टिङ्) जस्ता क्रियाकलाप महोत्सवका आकर्षण हुने आयोजकले जनाएको छ । ‘पूर्खाको पौरख, नेपाली गौरव’ नारासहित आयोजना हुने महोत्सवमा सांस्कृतिक तथा मनोरञ्जनात्मक कार्यक्रम र खेलहरु समावेश गरिनेछ ।

 

 

प्रतिक्रिया दिनुहोस्