निसान म्याग्नाइटको फेसलिफ्ट २१ फेब्रुअरीमा सार्वजनिक हुँदै

काठमाडौं । नेपाली बजारमा कुनै समय निकै चर्चित बनेको निसान म्याग्नाइटको फेसलिफ्ट संस्करण नेपाल भित्रिएको छ ।

नेपालका लागि निसानको आधिकारिक वितरक पायोनियर मोटोकर्पले निसान म्याग्नाइट फेसलिफ्ट संस्करणका नयाँ गाडी आउने शुक्रबार (२१ फेब्रुअरी) मा सार्वजनिक गर्न लागेको जनाएको छ । नेपाली सडकमा पहिले पनि प्रशस्तै निसान म्याग्नाइट उपलब्ध छन् ।  अझै सुधारिएको भर्सनको रुपमा यसको फेसलिफ्ट भर्सन आइपुगेको हो ।

यसको ग्रिल र क्रोम वरिपरि पुनः डिजाइन गरेर फ्रन्ट बम्पर र एलईडी टेल लाइट समावेश गरिएको छ । साथै यसमा १६ इन्चको ड्युअल टोन अलोय ह्विल नयाँ डिजाइनको राखिएको छ भने फ्रन्ट फग ल्याम्प पनि नयाँ डिजाइनमा आएको छ ।

यसको इन्टेरियरमा धेरै परिवर्तन गरिएको कम्पनीले जनाएको छ । यसको ड्यासबोर्ड, डोर प्याड र सेन्टर कन्सोल वरपर नयाँ ब्लाक र ओरेन्ज रङको थिम दिइएको छ । यसको ड्यासबोर्ड लेआउट, एसी भेन्ट्सको डिजाइन र स्टेयरिङ ह्विल प्रि(फेसलिफ्ट मोडलभन्दा एकदमै भिन्न छ ।

८ इन्चको टच स्क्रिन, ७ इन्चको डिजिटल ड्राइभर डिस्प्ले, ४ रङको एम्बियन्ट लाइटिङ र वायरलेस फोन चार्जर जस्ता फिचर यसमा समावेश छन् । सेफ्टीका लागि ६ वटा एयरब्याग, टायर प्रेसर मोनिटरिङ सिस्टम, अटो डिमिङ आईआरभीएम र ३६० डिग्री क्यामेरालगायत अन्य फिचर उपलब्ध गराइएको कम्पनीले जानकारी दिएको छ ।

यसमा १ लिटर नेचुरल्ली एस्पिरटेड पेट्रोल र १ लिटर टर्बो पेट्रोल इन्जिन गरी दुई विकल्प छ । यसको १ लिटर नेचुरल्ली एस्पिरेटेड पेट्रोल इन्जिनले ७२ पीएस पावर र ९६ एनएम टर्क जेनेरेट गर्छ भने १ लिटर टर्बो पेट्रोल इन्जिनले १०० पीएस पावर र १६० एनएम टर्क जेनेरेट गर्छ । शुक्रबार नै मूल्य सार्वजनिक हुने बताइएको गाडी किफायती मूल्यमा उपलब्ध गराउने कम्पनीका अधिकारीहरुको भनाई छ ।

प्रतिक्रिया दिनुहोस्