सात महिनामा झन्डै १० खर्ब रुपैयाँको वस्तु आयात हुँदा एक खर्ब २७ अर्बको निर्यात

काठमाडौं । चालु आर्थिक वर्ष २०८१/८२ को सात महिनामा वस्तु तथा सेवा निर्यातबाट प्राप्त हुने रकम ४६.५० प्रतिशतले बढेको छ ।

सो अवधिमा एक खर्ब २७ अर्ब २० करोड रुपैयाँको वस्तु तथा सेवा निर्यात भएको भन्सार विभागले जनाएको छ । विभागका अनुसार, गत आर्थिक वर्षको सात महिनामा ८६ अर्ब ८३ करोड रुपैयाँको वस्तु तथा सेवा निर्यात गरिएको थियो । गत वर्षको तुलनामा यो वर्षको पहिलो सात महिनामा ४६.५० प्रतिशतको सुधार भएको देखिएको छ ।

तथ्यांक अनुसार निर्यातसँगै आयात पनि १० प्रतिशतले बढेको छ । पछिल्लो सात महिनामा नौ खर्ब ८८ अर्ब ५८ करोड रुपैयाँको वस्तु तथा सेवा आयात भएको कार्यालयले जनाएको छ । समीक्षा अवधिमा आयात १० प्रतिशतले बढेको छ । गत वर्षको माघ मसान्तसम्म आठ खर्ब ९७ अर्ब ९४ करोड रुपैयाँको वस्तु तथा सेवा आयात भएको थियो ।

गत वर्षको माघ मसान्तसम्मको तुलनामा व्यापार घाटा पनि बढेको छ । सात महिनाको अवधिमा व्यापार घाटा आठ खर्ब ६१ अर्ब ३८ करोड रुपैयाँ पुगेको छ । गत वर्षको सोही अबधिमा व्यापार घाटा आठ खर्ब ११ अर्ब ११ करोड रुपैयाँ थियो । भन्सार विभागको तथ्यांक अनुसार नेपालको कुल वैदेशिक व्यापार तुलनात्मक रुपमा १३ प्रतिशतले बढेको छ ।

प्रतिक्रिया दिनुहोस्