कृषि क्षेत्रको विकासमा बाह्रबिसे नगरपालिका सजग

सिन्धुपाल्चोक । बाह्रबिसे नगरपालिकाका प्रमुख बालकृष्ण बस्नेतले नगरले कृषकको हितमा काम गर्दै आएको बताएका छन् ।
नगरपालिकाले बजेट विनियोजन गर्दा कृषकलाई अनुदानका लागि पर्याप्त बजेट विनियोजन गर्दै कृषक र कृषि क्षेत्रलाई उत्पादनमूलक बनाउन काम गरिरहेको बस्नेतले बताएका हुन्।
बाह्रबिसे नगरपालिका–७ कालिदेवी आधारभूत विद्यालयमा भएको शैक्षिक मेला कार्यक्रममा स्थानीयमाझ बोल्दै नगरप्रमुख बस्नेतले शैक्षिक क्षेत्रलाई बलियो बनाउनसके अन्य क्षेत्रमा पनि सुधार हुँदै जाने बताएका छन् । नेपाल कृषि प्रदान देश भन्ने गरिए पनि अहिले कृषि क्षेत्र बिस्तारै खस्किँदै गएकाले बाह्रबिसे नगरपालिकाले किसान र कृषिक्षेत्रको विकासमा योगदान दिँदै आएको दाबी गरे ।
उनले भने– ‘हामीले शैक्षिक क्षेत्रसँगै कृषिलाई उत्पादनमूलक बनाउन सके स्थानीय जनतामा आर्थिक वृद्धि हुँदै जानेछ ।’
बस्नेतले भने– ‘स्थानीय सरकारले हरेक क्षेत्रलाई ध्यान दिएर काम गरिरहेको छ, तपाईंहरुले नगरपालिकाबाट पाउने सेवालाई चुस्त बनाएका छौँ । भौगोलिक हिसाबले अप्ठ्यारो रहेको बाह्रबिसे नगरपालिकाले बाढी–पहिरोको सामनासमेत गर्नुपरेको छ । तर नगरपालिकाले नगरबासीको हितलाई मध्यनजर गर्दै शिक्षा, स्वास्थ्य र कृषिमा ठूलो लगानी गर्दै आएको छ ।’
यसैबीच बाह्रबिसे नगरपालिकाले केही समयअघि हल गोरु पाल्ने कृषकलाई बिमासहितको अनुदान रकमसमेत वितरण गरेको थियो ।

 

प्रतिक्रिया दिनुहोस्