सिन्धुपाल्चोक । माझी समुदायले लदी पूजा धुमधामले मनाएका छन् ।
इन्द्रावती नदी आसपास बसोबास गर्दै आएका सिन्धुपाल्चोकका माझी समुदायले इन्द्रावती नदी किनारमा लदी अर्थात् नदीको पानीलाई पूजा गरेका हुन् । बुधबार माझी समुदायको सांस्कृतिक विधिअनुसार सो पूजा गरिएको हो ।
लदी पूजाका अवसरमा माझी समुदायले आफ्नो सांस्कृतिक परम्परालाई झल्कने गरी कार्यक्रम गरेका छन् ।
लदी पूजामा पुगेका कांग्रेस सांसद मोहनबहादुर बस्नेतले माझी समुदायले मनाउने पूजाको विशेष धार्मिक र सांस्कृतिक महत्त्व रहेको बताए । पछिल्लो समय परम्परागत कार्यक्रम मासिँदै गएका बेला माझी समुदायको यो पूजाले संस्कृति संरक्षणमा समेत टेवा पुगेकाे नेता बस्नेतको भनाइ छ ।
नेता बस्नेतले भने, ‘हामीले संस्कृतिको जगेर्ना गर्नुपर्छ । सांस्कृतिक सम्पदा हाम्रा अमूल्य निधि हुन् । माझी समुदायको लदी पूजाले संस्कृतिको जगेर्नामा समेत टेवा पुगेको छ।Ú
यसैबीच, कांग्नेस नेता बस्नेतले लदी पूजाको अध्यक्षकोष निर्माणको लागि ५१ हजार रुपैयाँ व्यक्तिगत सहयोग गर्ने वचन दिएका छन् ।
कार्यक्रममा इन्द्रावती गाउँपालिकाका अध्यक्ष झम्कनाथ नेपालले गाउँपालिकाले विभिन्न जातजातिका सांस्कृतिक पर्वहरुलाई जगेर्ना गर्न विविध कार्यक्रम गर्ने योजना बनाएको बताए । सीमान्तकृत समुदायलाई लक्षित गरी पालिकाले कार्यक्रम बनाउने बताए ।
कार्यक्रममा आफ्नो धारणा राखेका अधिकांश माझीहरुले नेपालमा अन्य समुदाय केन्द्रित चाडपर्वहरुमा बिदा दिने गरे पनि माझी समुदायलाई राज्यले कुनै प्राथमिकता नदिएको र यस्तो पर्वमा बिदा दिनुपर्ने माग गरेका छन् ।
माझी समुदायले लदी पूजालाई कोशी पूजाको समेत संज्ञा दिँदै आएका छन् । यो पर्व माझी समुदायको सबैभन्दा ठूलो पर्व पनि हो ।
प्रतिक्रिया दिनुहोस्