सिन्धुपाल्चोक । बाह्रबिसे नगरपालिका–७ ज्यामलिङस्थित बालकल्याण आधारभूत विद्यालयका विद्यार्थीलाई शैक्षिक सामग्री हस्तान्तरण गरिएको छ ।
शेर्पा ब्रदर्श ग्रुपले बाह्रबिसे नगरपालिका–७ ज्यामलिङका विद्यार्थीलाई शैक्षिक साग्री उपलब्ध गराएको हो । विद्यालयमा एक कार्यक्रमको आयोजना गरी बाह्रबिसे नगरपालिकाका प्रमुख बालकृष्ण बस्नेतको प्रमुख आतिथ्यमा शैक्षिक सामग्री हस्तान्तरण गरिएको बालकल्याण आधारभूत विद्यालयले जनाएको छ।
कार्यक्रमका प्रमुख अतिथि नगरप्रमुख बस्नेतले शैक्षिक ज्ञान हासिल गरेका दक्ष युवाले संसारमा कहीँ कतै दुःख भोग्नु नपर्ने बताए।
बस्नेतले भने, ‘शिक्षाबिना कुनै पनि क्षेत्रमा प्रगति सम्भव छैन । राजनीतिमा पनि शैक्षिक क्षेत्रको ठूलो महत्त्व रहेको छ ।’
नगरप्रमुख बस्नेतले शैक्षिक ज्ञान हासिलमा बालबालिकालाई प्रोत्साहन गर्नुपर्ने समेत बताएका छन् ।
यसैबीच, बाह्रबिसे नगरपालिकाले कक्षा १२ सम्म निःशुल्क गरेको र नगरपालिकाले कक्षा १० सम्म दिवा खाजाको व्यवस्था गरेको समेत नगरप्रमुख बस्नेतले जानकारी दिए । नगरपालिकाले वार्षिक ४ करोड शिक्षामा लगानी गरेको तर त्यसको नतिजा भने चित्तबुझ्दो नआएको बस्नेतले बताए ।
अहिले टेक्नोलोजीको समय भएकाले हामीले टेक्नोलोजीसँगै व्यावहारिक शिक्षामा जोड दिनुपर्ने बस्नेतको भनाइ छ।
उक्त विद्यालयलाई बाल्टिन ६ थान, जग ६ थान, ह्वाइटबोर्ड ८ थान , कपडाको चकटी ३० थान , कुचो ५ थान, डस्बिन ८ थान, हाजिरी कपी फाइल १० थान, प्रति विद्यार्थी ३५० थान कपी कलम, कुचो ५ थान, ३५० थान सिसाकलम, एक थान दराज , ल्यापटप, ज्यामिति बक्स, विद्यालय ब्यागलगायत खेलकुदका आवश्यक सामग्री वितरण गरिएको शेर्पा ब्रदर्श ग्रुपले जनाएको छ ।
विद्यालय र विद्यार्थीलाई सहयोग उपलब्ध गराएको शेर्पा ब्रदर्श ग्रुपलाई विद्यालय परिवारले धन्यवाद दिएको छ।
प्रतिक्रिया दिनुहोस्